“facemu divulgazioni”

 E la monaca racchiusa,
Chi avi sempri ostruzioni,
Facci pallida e giarnusa,
Isterii, convulsioni,
Viva viva a tuttu ciatu
Lu muscatu di Catania, o Siragusa:
Nun è cura radicali,
Ma minura li soi mali.
A li schetti affruntuseddi,
Chi su’ timidi e scurtisi,
Calavrisi
Li sbulazza,
E li fa nesciri in chiazza

Li cattivi, li mischini,
Chi su’ scuri e ’ngramagghiati,
E ànnu l’occhi sempri chini
Di li tempi già passati,
Pri nun aviri cchiù filati e baschi
Durmissiru la notti cu dui ciaschi

Maritati, chi o li siddi
O la scura gilusia
Vi à livatu l’alligria,
E vi à risu laschi e friddi,
Si vui tummati malvacia di Lipari,
’Nfurzati, e quadiati comu vipari.
E chiddi debuli,
Chi ’ntra lu stomacu
Cci ànnu lu piulu,
Chini di viscitu,
Di flemmi e d’acitu,
Cu facci pallida,
Cu carni sfincida,
Divinu viviri
Lu Risalaimi (4),
Ch’è sanatodos,
Anzi è lu lapisi
Di li filosofi;
E si vivennulu
E rivivennulu,
Nun si sullevanu,
Nè si ristoranu,
Torninu a biviri
A battagghiuni
Varrili e ciaschi,
Finchì abbuluni
Ci nescia pri l’oricchi e pri li naschi.

Pri qualchi malinconicu mischinu,
Chi avi l’occhi ’nfurrati di prisuttu,
E ’ntra un munnu, di beni e mali chinu,
Lassa lu bonu e s’applica a lu bruttu;
Chi stà mesto e distrattu ’ntra un fistinu,
E ’ntra làstimi poi s’applica tuttu;
Vinu di li Ciacuddi lu quadia,
E lu guarisci di la sua fuddia.

Si qualchi bàcchiara,
Simplici e tennira
Senti ’ntra l’anima
Qualchi simpaticu

Vermi chi rusica,
E prova spasimi,
Sintomi e sincopi,
Granfi di màtiri
Cu effetti isterici
Ed autri strucciuli
’Ntra ventri ed uteru,
Si la voli poi ’nzirtari,
E scacciari
Sti fantastici virmazzi,
Viva guarnaccia di li Ficarazzi.
Trinchi, tummi la guarnaccia,
Chi un diavulu a nautru caccia.

Bisogna cunviniri, amici cari,
Tutti li vini sunnu beddi e boni,
Sunnu la vera ambrosia di li Dei;
Ma in bona paci dittu sia tra nui,
(Sacciu chi parru ccà cu mastri mei)
Lu vinu cchiù eccellenti e prelibatu,
A miu pariri, è chiddu accutturatu.

(continua…)