M’accattave a giardiniera

Acchiana, maliritta acchiana, picchi fae accussi? Camurria acchiana! Iapico ù carrettere si sciarriva comu ù solito cu a sò mula, mentre stava acchiananno a ghire a casa. A mula ormae era vicchiaredda e di fare s’acchiante unni putia chiu, e na sira quanno erano arrivate anticchia chiù n’capo ri San Francisco a  mula si chiantao n’terra, pi smuvilla e falla arrivare a casa ci vosero tri ure e tutte i megghio bistemie ri Iapico, cà sà siritina era fora ra grazia ri Dio e i sante ru Paraddiso i fice acchianare e scinnere na para i vote.

Arrivato a casa e misa a mula rintra a stadda, mentre stava mancianno si mise a parrare cu sò mugghere Tanina e ci risse ca accussì un putia chiù ghire avante; sa mula maliritta ù stava facenno impazzire.

Sta storia si ripitio pi na simana, e na sira Iapico pigghiao una decisione cà poe si dimostrao drammatica, tragica. Infatti unnumane matina appena si susio ru letto si fice u bagno si mise u vistito ra festa e niscio. Iapico quanno era surdato avia fatto comu rice iddu u “carrittere motorizzato” ovvero acchianava e scinnia cu un furguneddo ra caserma a stazione pi cunto ru colonello. E di tanno c’avia arristato u purce n’testa ru furgunedo. Infatti sà matinata Iapico senza ririce nente a so mugghere scinnio a stazione pigghiao u treno e arrivato m’Palermo si mise a caminare pa sede centrale ra Fiat. S’arricampao a sira tutto cuntento e so mugghere virennolo arrivare tirao un suspirune e ci dumannao unn’ avia stato e iddo tutto cuntento ci risse: Tanè ri rumane matina sarò u primo carrittere motorizzato ru paise. Tanina u taliao n’anticchia na facce, si assittao, si mise a travagghiare chi buse e un disse nente.

Un mise dopo nà chiazza c’era menzo paise a virire arrivare a machina ri Iapico e tutti taliavano, anticchia a machina e anticchia Iapico, cù l’occhi sgranati. A machina era veramente bella, celestina chi rote e cu parafango rinforzato e cu un cofano cà ci capiano 8 casciuna ri robba. Però subito nascero i problemi. Fino a quanno u mezzo ia nà l’asfalto o no lastricato tutto apposto, ma, pi falla acchianare fino a casa ri Iapico, ca era na punta avuta ri san Vicenzo cà pi arrivarice c’è na stratuzza stritta stritta china ri fango, successe l’ira ri Dio: cinco cristiane chi ammuttavano un ci putiano a falla ire avanti e poi a secunna curva ‘menzo i case a machina avia già ru srticuna e Iapico bistimiava peggio ri quanno a mula un vulia acchianare, virenno cà a machina un putia passare a purtaro chù sutta e a lassaro ravante a casa ri Presti. Di tanno m’poi chisso fu u so posto.

E Iapico pi purtare i casciuna ra casa ri Presti fino a so casa fue costretto a ghire a scasare a mula ra stadda, e chidda pi farici sfregio o patrune ia avante senza firmarise mae, comu si fusse na giardiniera.