“Facemu divulagazione”

Cà c’è n’autru pezzo

(…)

Vinu Vinu
Sciàllaba sciàllaba,
Tumma tumma tummà,
Cori cuntenti, e tummàmu cumpà!
Cannati, arci-cannati, anzi purpaini,
Tumma, tumma, cumpagnu, a trinch-vaini;
Chi cu ’na ’nsirragghiata di sciroppu
Si campa allegru e si vinci ogn’intoppu;
E nni fa fari sauti, comu addàini.

L’avirrò pri un sollenni cacanàca,
Erramu, tintu, putrunazzu e vili,
Cui di nui chista sira ’un s’imbriaca,
E chi nun crepa sutta lu varrili.

Scattassi lu diàntani,
Chi vogghiu fari un brinnisi
A Palermu lu vecchiu, pirchì in pubblicu
Piscia e ripiscia sempri di cuntinu
’Ntra la funtana di la Feravecchia;
E pisciannu e ripisciannu
Lu mischinu cchiù s’invecchia

Jeu vivu in nomi to, vecchiu Palermu,
Pirchì eri a tempu la vera cuccagna;
Ti mantinivi cu tutta la magna,
Cu spata e pala, cu curazza ed elmu.
Ora fai lu galanti e pariginu,
Carrozzi, abiti, sfrazzi, gali e lussu;
Ma ’ntra la fitinzia dasti lu mussu,
Ca si’ fallutu ohimè senza un quatrinu.
Oziu, jocu, superbia mmaliditta
T’ànnu purtatu a tagghiu di lavanca;
Tardu ora ti nni avvidi, e batti l’anca;
Scutta lu dannu, pisciati la sditta.

Ma vàjanu a diavulu
St’idei sì malinconici;
D’ora ’nnavanzi in cumpagnia di Baccu
Vogghiu fari la vita di li monaci,
Quali cantannu, vivennu, e manciannu
Càmpanu cu la testa ’ntra lu saccu.

(continua…)